សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញទទួលវ៉ាក់សាំងជំនួយពីចិន១០ម៉ឺនដូស ដែលផ្តល់ជូនកាកបាទក្រហមកម្ពុជា
ភ្នំពេញ: ជំនួយវ៉ាក់សាំងបង្ការជំងឺកូវីដ-១៩ របស់ចិនប្រភេទស៊ីណូហ្វាម ចំនួន១០ម៉ឺនដូសបន្ថែមផ្តល់ជូនជាពិសេសដល់កាកបាទក្រហមកម្ពុជា បានដឹកមកដល់ព្រលានយន្តហោះអន្តរជាតិភ្នំពេញហើយ នៅល្ងាចមិញនេះ នាថ្ងៃទី២៣ ខែសីហា ឆ្នាំ២០២១។
ពិធីប្រគល់ និងទទួលជំនួយវ៉ាក់សាំងនេះ បានធ្វើឡើងនៅព្រលានយន្តហោះអន្តរជាតិភ្នំពេញ ក្រោមអធិបតីភាព សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងលោក វ៉ាង វិនធាន អគ្គរដ្ឋទូតចិនប្រចាំនៅកម្ពុជា ដោយមានការចូលរួមពីមន្រ្តីពាក់ព័ន្ធមួយចំនួនផងដែរ។
ជំនួយវ៉ាក់សាំងបង្ការជំងឺកូវីដ១៩ សម្រាប់កាកបាទក្រហមកម្ពុជានេះ ត្រូវបានដឹកមកដល់ស្របជាមួយនឹងជំនួយវ៉ាក់សាំងបង្ការជំងឺកូវីដ១៩ របស់កងទ័ពរំដោះប្រជាជនចិន ជូនដល់ក្រសួងការពារជាតិកម្ពុជា។
ចិនបានផ្តល់វ៉ាក់សាំងកូវីដដល់កម្ពុជាសរុបជាង២២លានដូសហើយ ដែលមានទាំងជំនួយ និងការផ្គត់ផ្គង់តាមការបញ្ជាទិញ ដែលក្នុងនោះចំនួនវ៉ាក់សាំងដែលជាជំនួយរបស់ចិន មានចំនួនរហូតដល់ ៣.៧លានដូស៕
